Historische binnenstad Mestreech

vaan bove aof bekeke.

(Jan vertèlt)

Historische binnenstad Mestreech vaan bove aof bekeke

 

Eigelek is de aw binnestad vaan Mestreech neet zoe groet, ieder breid daan laank ... Vaan oonderop gezeen höbste bekans gein euverziech vaan us sjoen binnestad met zien markante monumentaal gievels en höbste dèks totaal gein idee, wat ziech aon de achterkant vaan dees bouwwerke bevint. Miestal zien de achterterreine verborge en neet touwgaankelek.

De Franse keuning, Lodewijk de vieftiende gaof, naotot heer Mestreech had ingenome, in 1748 opdrach um ’n maquette vaan us stad te make. Bliekbaar stoonte in Versailles in deen tied zoe’n 100 maquettes (boe oonder die vaan Mestreech) boe heer mèt kós proonke, umtot heer die allemaol had veroverd. Dees maquette bevint ziech tegeswoordig neet mie in Paries, mèr in 't Museum voor schone kunsten in Lille (Rijsel) . Gelökkeg heet Mestreech nog ’n sjoen kopie vaan dees maquette in zien bezit. Dees steit örreges in ’t Centre Ceramique. Vraog eve aon de receptie boe. De kins hei in eine ougopslaag op zien wie us stad,(aon beidskante vaan de Mäös) d'r in 1750 oetzaog, mèt al zien kèrke, pleine en woenhoezer.

 

Iech vräög miech dèks aof wie ze die maquettes, mèr ouch die gedetailleerde teikeningen vaan vreuger gemaak höbbe. Lochbalonne waore d’r nog neet, die woorte pas in 1783 oetgevoonde. En d’r waore in deen tied zeker nog gein drones, vleegmesjienes of helicopters, wel zwiege sateliete.

 

'n Knap stökske werk …..

Um uuch eineg idee te geve wie de binnestad vaan bovenaof roont 1890 oetzaog, höb iech 2 foto’s towgevoog.

Eine is genome vaanaof d'n tore op ’t Dinghoes oet 1470, dee es oetkiektore fungeerde. De wachter kós vaan hei aof in de gate hawwe of d’r gein legers in aontoch waore en of d'r neet örrges brand waor, aongezeen de mieste hoezer nog vaan hout gebouwd waore.

Miene ampa waor nog lid vaan de lóchbesjermingsdeens dee vaan 1939 tot 1945 in ut Dinghoes gevestig waor.

D'n aandere foto is gemaak vaanoet de middetore vaan de Sintervaos dee in 1955 door ’ne brand ten oonder góng. Vaan hei aof höb geer ’n prachtig ziech op de zuidoost kant vaan ’t aajt centrum vaan de stad.

Bron  Jan Schelling,  foto Jan Schelling.

eine terök