Donaties en Bedelfèlmpkes

(Jan vertèlt)

Donaties en Bedelfèlmpkes:

Donaties en bedelkfèlmkes

De zuus ze ummer miejer op d'n tv. Bedelfèlmkes veur zoegenaomde gooj doele, boebij op de luij hun gemood weurt gespäöld. Este die fèlmkes zuus kreigste bekans 'n sjöldgeveul este niks zows geve en donere. Dees week zaog ieg zoe'n fèlmke vaan World Animal Protection. Iech wow hei toch gèt miejer euver weite. Dees organisatie zörg oonder aandere deveur tot euver de hiele wereld bere weure opgevaange, um misbruuk en elend veur die bieste te veurkoume. De bere die aon die organisatie weure euvergedrage of bevrijt zien, kriege 'n opvangplèk.

 

De 3 belangriekste reije die men aongief zien: 't stóppe vaan bere-hóndegevéchte, vaan dansshows en de beregalindustrie, boebei de gal vaan de bere weurt gebruuk es tradioneel medicijn.

Tot noe tow 'n gewéldig initiatief .....

Sommige oonder us kinne mesjiens nog de iezere berekouw in 't stadspark vaan Mestreech. Dees kouw woort in 1920 gebouwd en waor 'n groete trèkpleister veur väöl Mestreechtenere. Michel Huisman en John Kerkhofs hóbbe hei 'n prachtige pagina aon gewijd: https://mestreechtersteerke.nl/Pagberekoil.htm

 

In 1970 woort de nuij berekoil geopend die in de plaots koum van die aw beroste berekouw. Iech plaots bewus 'ne foto vaan de opening vaan dees koil. Mesjiens zeet geer uuch zelf nog hei op trök.

Veer zien hei allemaol groet met gewore.

Wat iech wèl zègke is tot veer allemaol qua geveul en wat veer allewijl normaal vinde in de loup vaan de tied veranderd zien. Niemes keek vreuger op vaan 't peerd vaan Beite, dat 'ne zwoere wagel moos trèkke of vaan 'n hóndekaar, boebei die errum bies woort mishandelt en aon de kèttel laog ...

 

Veer wiste neet beter ....

 

Noe vinde veer ut neet mie normaal tot zoeget vreuger kós en make veer zoonder bezeij geld euver veur die luij die die mistowstande 'ne halt tow wèlle rope.

Iech had 't bekans gedoon ......

Totdat iech laos tot d'n directeur/eigeneer vaan World Animal Protection, miejer es 100.000 Euro per jaor d'r aon euver hèlt.

Dus weit boeraon geer doneert!

Iech laos weijer tot de broune beer volges biologen en ouch bevestig door opnames mèt wèldkamera's trök in Nederland is. En zoonder tot iemes ziech hei met verriek heet.

 

D'r is dus nog hoop ....!!!

Naor Bove

Bron  Jan Schelling, foto Jan Schelling

eine terök