Laank Grèchsje

(Jan vertèlt)

't Laank Grèchsje

Zoe wie väöl lui hoegswoersjijnelek al weite, zien de stadspoorte en de mieste stadsmör, nao ’t oontmantele vaan de vesting Mestreech, tösse 1867 en 1874, bekans allemaol aofgebroke.
Allein de Hèlpoort is op initiatief vaan Victor de Stuers gespaord gebleve. In deen tied waor de Hèlpoort trowwens zjus wie de kroettore in Wieck ’n opslaagplaots veur böskroet.
De Stuers zörgde deuveur tot de Hèlpoort met de aongrenzende mör gerestaureerd woorte. Weliswoer met hiel väöl fantasie, want die sjoen kantele en d'n hooktore aon de Slevrowwewal höbbe daor vreuger noets in deze vörm gestande.

De Stuers maakte ziech d’r ouch stèrk veur tot deile vaan de aw stadsmör, zoewie in ’t latere Hèrtekamp, woorte gehandhaaf en gerestaureerd.
Ouch de mör aon 't Klein en Laank Grèchsje woorte tösse 1908 en 1912 opgeknap.
Naotot ’t belang vaan de vesting steeds ’n kleiner beteikenes kraog in Mestreech, waore hei in de loup vaan d'n tied klein huiskes tege de walmoer aongebouwd. Op dees foto oet 1895 zeet geer nog ein vaan dees huiskes ligke op d’n hook vaan de Pieterstraot en ‘t Laank Grechsje (neve kaffee de Pieter).


Toen de walmör woorte gerestaureerd, woort metein vaan de gelegenheid gebruuk gemaak om die aw bragke aof te breke.
Iech moot zegke, ouch die klein huiskes
hadde wèl gèt, mèr dèks is ‘t ’n kwestie vaan käözes make.
In eder geval woort door de aofbraak vaan die aw huiskes de walmoer ter plaotse vaanaof de stadskant weer obbenuits
ziechbaar.

Aanvulling Emy Herremans op FaceBook:

Sjoen foto ' s . Dee met dat huiske hub ich noets gezeen . Ich kin ' t Grèchsje good. In de jaore 50 woende veer in de Taofelstr. En de twie vinsterkes vaan de slaapkamer vaan Mien awwers kaome oet op ' t Grèchsje en ich sproong es keend dao wel ins oet ..Och ging ich veur Miene Pa met ' n ketelke .....mosselen hoole bij de vesboer . Dee woende op ' t heukske vaan de Hilarius straot. In de nisse vaan de walmoer stoonde met de Heiligdomsvaart .....heiligebeelde en daan s ' aovends brande dao keerskes veur. Dat koos nog in deen tied . Mèr ' t verhaol vaan Jan is interessant en mer good tot ' t is opgeknap.

Bron  Jan Schelling, Emy Herremans foto's Jan Schelling

eine terök