Opgedeild Wiek....

Opgedeild Wiek ....

Wiek waor vreuger opgedeild in twie deile.
't Noordelek gedeilte roontelum de Sint Martinuskèrk en de Wilhelminasingel en de Alexander Battalaan boe de sjiek vaan Wiek en de beter gesitueerde woende.
En 't zuidelek gedeilte roontelum de Hoegebrögkstraot en aongrenzende straote, zoewie 't Gerèchsje en de Ruterstraot, boe väöl errum sodemieters woende die miestal op de Zjerremiek werrekte.
Väöl vrouwlui oet de errum buurt wèrkte ouch es deensmaog in de sjiekere buurte.
In 1939 woort, in verband mèt ’t townumme vaan ’t aontal parochiane en ’t "oonmaotsjappelek" karakter, door de bissjop veurgestèld um de achterbouw vaan ’t veurmaoleg gashoes “De Gouden Leeuw", gelege aon de Rèchstraot nómmer 69, es ’n soort vaan dependance kèrk vaan de Martinuskèrk in te laote riechte.
De preester die in dees kerk zow weure aongestèld zow ziech speciaol bezig mote goon hawwe met de zielzörg vaan de lui die daor woende.
’t Kèrkbestuur benumde kepelaon Franck in 1939 tot kepelaon vaan dees hölpkèrk in opriechting, die woort genump naor de Heilege Gerardus (Majella).
Kepelaon Franck kós de zaol achter “de Gouden Leeuw” in 1941 mèt eige geld koupe.
Heer wow evels ’n groeter oonaofhaankelekheid vaan ’t bestuur vaan de groete Sint Martinus parochiekèrk aon de Rechstraot.
Dát waor tege de zin vaan de bissjop en in 1946 woort Franck es kepelaon euvergeplaots naor Bocholtz.
Vaaanaof dat momint kraoge 2 paoters Franciscane de leiing euver de Sint Gerarduskèrk.
Veural paoter Serapion waor zier geleef oonder de bevolking.
Mien pap en mam lepe in eder gaval mèt häöm eweg. Serapion trouwde hun zellufs in Banneux in de Ardennen.
Roontelum 1950 woort d'r langs de Maos, achter de Zjerremiek, 'n speultuinsje aongelag, boe väöl Wiekenere nog gooj herinneringe aon zalle höbbe.
In de volksmoond hètde dat 't Weike.
Vaanaof 1951 woort de taak vaan die twie paoters weer euvergenome door ‘ne kapelaon vaan de Sint Martinuskèrk, kepelaon Kluijtmans.
Heer waor ouch zier geleef bij de bevólking en weurt nog ummer door väöl lui in gedachte gehawwe.

In 1959 woort 't Sint-Martinushoes in 't pand Hoegebrögkstraot nómmer 42 geopend, 't Waor 't ierste kathelieke buurthoes in Nederland.
't Waor bestump veur 't oonmaotsjappelek deil vaan de Sint-Martinusparochie in Wiek-Zuid.

Wiek-Zuid woort in de 50-er en 60-er jaore gesaneerd en de oonmaotsjappeleke woorte euvergeplaots naor de boetewieke, boe zie ’n zoegenaomde opvoeding krege veur hun oonmaotsjappelek gedrag.
’t Woorte woensjaole genump.
Wiek leep leeg en de hoeser in Wiek-Zuid woorte onbewoenbaar verklaort.
Mèr daoreuver later miejer ......

Aanvulling via FB door

Pierre Peek En d,n aandere is paoter Raimund. En iech woende rech tegeneuver ,t kerkske op 21a boove de koolepoort vaan Dassen

Els Beetz Leuk um weer get te lieren. Iech hub altied gedacht dat het Gerarduskerkske in de Wieckergrachtstraot laog. Antwoord Jan Schelling; De ingaank is later gemaak aon de Wieker Grachstraot . Mèr oersprunkelek laog 't perciel boe de kèrk gebouwd is aon de achterkant vaan de Rechstraot nómmer 67

Jan Heijnen waor ouch zoe! Via de poort in de Rechstraot ging men naor de sacristie, en me kôs zoewel in de Rechstraot es aon de Grachstraot naor binne! Mer de hoofingaank waor in de W. Grachstraot.

Emy Herremans Dat kerkske dao ging ich es klein keend met mien tentjes nao touw es ich bij hun had geslaope. Zie woende in de A. Battalaan op 48. Ich ging gere mèt. De ierste kier met de Pauswake. In de nach....veer kraoge une bougie in us han en wachde tot de kapelaan met dikke stein 't vuur aon had gekets. In de kerk volledige duusternis. Wat spannend.Toen waor 't geluk en kooste veer rij veur rij us keers laote aonsteke. Is hiel lang geleije mèr vergeet ich noets. Bin altied met gegaange.

Richard Peeters Ieg bin oug opgegreujd in de Wiekergrachstraot, 's zoondags ginge veer nao de "kathedraal" es wie ut kerkske bei us genump woort. In de paosweek heet keplaon Kluytmans (leeve mins) oets, op witte Donderdag un voetwassing gedoon in naovolging vaan Jezus hiel lang geleije. De apostele woorte gevörremp door hoeg bejaarde Wieckenere, ieg waor dao met miene toen beste vrund René en veer hadde us op d'n oxaol versjans pal veur d'n ölleger, toen menier keplaon met de lampetkan doorkwaom mooste de sjeun oet bij de "apostele", wie dát ging is neet nao te vertelle meh veer kraoge dao de slappe lach, vreiselik, ieg had nog noets zoe gelache en höb oug noets mie zoe gelache en sjöddelentere vaan de lach zien veer, oonder ut aofkuirend oug vaan unne zekeren drogis, dee oug dao bove zaot, mer gaw nao oonder en nao boete gegaange. Vreiselik meh wel leuk. Sommige vaan mien zusterkes höbbe nog gezongen in ut Gerarduskoer totdat de kerk woort geslote, Lili, Yvonne, Anneke en Harie Loontjens zwejde dao de plak. Ut verhaol ging dat Mr. Loontjens op zeker momint zien tuut vol had vaan ut feit tot ut hiel koer gewoen Harie tege höm zag, dat mos Menier Loontjens weurde, boe op ut hiel koer zag "da's good Harie" Kint geer Uuch dao get vaan herinnere ? Antwoord door Gerda van den Hoeven de marteling van de eerste communie maar je kreeg ook cadeautjes na afloop. Weet alleen niet meer - vanuit fotografenstandpunt - gezien of het ölleger links of rechts was. Er was wel een knop waarmee je de luchtblaasinstallatie in werking stelde om de orgelpijpen te laten zingen. Geweldig! mijn liefde voor het ölleger is daar op het balkon begonnen (keith emerson). 

Bron  Jan Schelling, foto Jan Schelling. Reactie Pierre Peek, Jan Heijnen, Emy Herremans en Richard Peeters via FB