Jan Schelling, wee is Jan Schelling:

Hoege Brögkstraot 54

Iech en mien broor zien gebore in Wieck op de Hoege Brögstraot 54. In Wieck woende vreuger de worteleboere.

De Wieckeneer waor tot begin 1900 eigelek geine èchte Mestreechteneer.

Heer waor ieder ‘ne boer daan ‘ne Sjeng.

De lui vaan Wieck höbbe ziech vaan de aandere kant eigelek noets èch Mestreechteneer geveult.

Ze veulde ziech miejer toes bei de boere vaan Hier en Heugem, daan bei die stadsbewoeners, die aon de euverkant vaan de Maos woende.

Dat vóllek woort es hautain en arrogant ervare.

Al in 1204 laog d’r ‘ne eerde wal um Wieck.

Dee wal woort in datzelfde jaor vertesteweerd door Hertog Hendrik d’n ierste oet Braobant.

In 1267 woort door Hendrik d’n derde, de Maosbrögk verrammesakkerd en de groete verdedigingstore aon de Körverspoort woort door dee vènt aofgebroke.

Met de stein vaan de Wiecker tore zow Hendrik d’n derde 't kestiel Monfort höbbe gebouwd.

Wat ’n krapuul ….!!!!

In 1284 woort, ’n bitteke naor ’t noorde vaan de Romeinse brögk, de Sintervaosbrögk gebouwd.

In 1297 woort Wieck, dat tot daan aon tow Luiks waor, Braobants.

Wat 'n sján ...., wee wèlt d'r in godsnaom noe bei Braobant hure ....

Begin vaan de 14e iew kreeg Wieck ’n steine umwalling.

Die hiel umwalling waor zoe’n 1100 meter laank.

De belangriekste poort waor de Duitse Poort.

Dees woort ouch wel Akerpoort of Hoegbrögkepoort genump.

Umtot dees poort neet in ’t verlèngde vaan de Sintervaosbrögk laog, móste de lui met hun kare en bajje door de Rechstraot en de Hoege Brögstraot.

Heidoor woorte aon dees straote de belangriekste hoeser vaan Wieck gebouwd, zoewie ’t Sint Gieleshospitaol, Refugiehoezer en poorthoezer vaan kloesters en adelekke femilies.

In mien geboortehoes woende in 'n kamer aon de veurkant ‘ne kleiermeeker, Mathieu Eikenboom.

Mien awwers höbbe miech vertèld tot ze dèks gesjriew en gevlook hoorte vaan Mathieu, zjus of iemes vermaord woort.

Mèt 2 klein keender maakte zie ziech daor netuurlek oongerös euver.

Zie hadde koum kontak mèt dee maan en wiste neet of dee te vertrówwe waor.

Lang denao koum oet tot Mathieu regelmaotig op vlege waor aon ’t jaoge en tot heer gans allein in die kamer woende ….

Heer stórf in 1957 ocherrem hielemaol allein op 85-jaorige leeftied in die kamer.

Zoe zuuste mer weer tot eenzaam lui soms gekke dinger goon doen en ze raar gevoonde weure.

En tot dinger dèks verkierd geïnterpreteerd weure ....nómmer

Bron  Jan Schelling, foto Jan Schelling.