|
|
Zwumme (Jan vertèlt) |
|
|
Zwumme (Jan vertèlt) |
|
Buurtwinkel vaan de bomma vaan miene pap, Mai Dello getrówd met Giel Nelissen. In ’t raom bove hink mien ama, Catharina Maria Nelissen, haaf oet de roet. Degenege dee allewijl bei de Aldi, Jumbo, AH, Plus of Jan Linders zien winkelkeerke völt met alderhande produkte oet gans Europa of vaan väöl weijer eweg, zal ziech zèlde aofvraoge wie ‘t winkele vreuger góng. Beveurbeeld aon ‘t het begin vaan de veurige iew. Netuurlek waore d’r in deen tied nog gein Supermèrrete. Tot wiet in de 19e iew kóch bekans ederein wat heer nudeg hat bei deginnege dee ’t maakte. Zoe kóchste beveurbeeld boter, melk, kies, vleis, greunte en fruit bei de boer. In de stad koume de boere vaan boete Mestreech edere week met hun waor naor de merret. Veur eder product hatste aander merrete, zoewie de vèsmerret boeste reveer- of zievès kós koupe. D’r waor ‘n merret veur sjeun- en kloompemekers, tówslegers, boontwerkers en ‘ne houtmerret (de Houtmaos) dee vaanwege ’t brandgevaar boete de umwalling laog. Eind 19e iew koume d’r in Mestreech ummer miejer klein buurtwinkelkes bei, die ouch ‘n sociaol functie hadde. Dees winkelkes hadde ’n klein assortimint , gein vaste prijze en wieneg veurraod. D’r hoofde miestal neet metein betaold te weure en d’r woort miestal op de póf gekoch. Betaole deechste este keisjum kreegs of este weer gèt beter bei kas zaots. Dèks stoont d’r ouch met sjoen lètters op de etalageroet te leze wat d’r in dee winkel te koup waor. Soms stoont d'r Comestibles (wat dat ouch maag weze) of Koloniale Waren op de roet. Zeip woort gesjaof of d'r woort 'n stök vaan 'ne groete blók aofgesnoje. Thee en koffie woorte los verkoch oet houte kiste die vaan binne met blaadtin bekleid waore. In klein läöjkes zaote neutemesjaot, foelie, witte of zwarte peperkorrels. Die klein winkelkes woorte miestal gedreve door maan en vrow. Dèks had de maan neve de winkel ouch nog ’n baon op ein vaan de febrikke es glaasblozer of es pottemenneke. Ouch de keender móste mèt hellepe in de winkel um kemissies roont te bringe of um de winkel te kére. Veur wedevrowwe waor zo’n winkelke dèks ouch de einege meneer um met häör keender te euverleve. Tije zien verandert ......... |
|
Bron Jan Schelling, foto Jan Schelling |
