Gedichten over Maastricht

LOL en PLEZEER ?

Noe geit ’t gebäöre

Gans Limburg geit ziech besjäöre

Vaan Eijsde tot aon de Mookerhei

Kröp ederein in gekleurde pekskes mèt zien prei

‘nen Hood op de kop en e good gevöld glaas

Weure ze de Vastelaovend altied de baas.

Alle sores weurt vaan taofel geveeg

En blaoze tege mör geleeg

Väöl draank nao binne wèrreke

En weer nao boete tege gievels vaan kèrreke

Gein respek mie, alle remme goon los

Dus zien eus sjoen gebouwe de klos.

Is dat fies, is dat Vastelaovend viere

Te kier goon wie losgeslage stiere ?

Is dat de defenitie vaan lol en plezeer

Diech vol laote laope mèt liters beer

Bekers en aofval vaan friet, frikkendel en krokèt

Roond gestruid wie ’n deke op e bèd.

Nein bèste luij, dit heet ech geine zin

Hijjmèt goejt geer ech eur eige roete in

De raod moot daan weer regelkes goon make

In de hoop tot geer daomèt gaot stake

Boe is de goodwèllende, de echte, gebleve

Dee de verkierde ’t veurbeeld wèlt geve.

Zègk noe zellevers, zoe kin ‘t neet doorgoon

Tot aon de èllebaoge in troep en rotzooi stoon

Laot edere vierder ziech ‘ns goon bezinne

En mèt sjiek viere vaan Vastelaond beginne

’t Geit hielemaol neet euver vollaope mèt beer

Mer Vastelaovend is e fies vaan: LOL en PLEZEER !

12-11-2008 © 2011 Opa Jam (Gène Schoenmaeckers)

’T  MOOSWIEF

Zuuch häör dao op 't Vriethof haange,

Eus Mooswief is us weer veurgegaange.

Daobove aon dee groete paol,

Heet ze plezeer mèt us allemaol.

Mèt 'ne kontente lach op häör geziech,

Kiek ze ammezant nao us umlieg.

Jao, Vastelaovend heet häör in ziene greep gevaange,

Daor liet ze ziech eder jaor gewoen veur haange.

Mèh nao dreij daog is 't weer gedoon,

En laote veer eus Mooswief spieteg nao oondere goon.

Daan zinge veer, zoonder eus traone weg te vege,

Jao diech höbs us aon 't hart gelege.

miert  2007 © 2011 Jeanne Vinck – Delcourt

Naor Bove

Bron:  Opa Jam Gene Schoenmaekers, Gwen van Uden, Fons Bollen-Facebook, Us Mestreechter Taol, Veldeke